लेटाङ । साना किसान कृषि सहकारी संस्था लिमिटेड लेटाङले सञ्चालक समिति, लेखा समिति र कर्मचारीहरुका लागि लेखा सम्बन्धि एकदिने तालिम प्रदान गरेको छ । संस्थाका अध्यक्ष नगेन्द्र प्रसाद घिमिरेको अध्यक्षता तथा साना किसान कृषि सहकारी केन्द्रीय संघका सञ्चालक समिति सदस्य खगेन्द्रराज भण्डारीको प्रमुख आतिथ्यतामा तालिम सञ्चालन गरिएको हो ।
संस्थाको सभाहलमा भएको तालिममा चार्टर एकाउन्टेन्ट सुवास आचार्य र रविन ढकालले सहजिकरण गर्नुभयो । तालिममा संस्थाका अध्यक्ष नगेन्द्र प्रसाद घिमिरे, उपाध्यक्ष मेनुका आचार्य सुवेदी लगायतका पदाधिकारी तथा सदस्यहरु, लेखा समिति संयोजक बाल कुमार श्रेष्ठ लगायत लेखा समितिका सदस्यहरु, सँस्थाका प्रवन्धक मनोज विष्ट लगायतका कर्मचारीहरुको सहभागिता रहेको थियो । तालिममा लेटाङ क्षेत्रमा कृयाशील अन्य छिमेकी साना किसान कृषि सहकारीका पदाधिकारी तथा कर्मचारीको समेत सहभागिता रहेको थियो ।
नेपाल सरकारले सहकारीको लेखा सम्बन्धि नयाँ ढाँचा लागु गर्न लागेकाले त्यसको तयारी स्वरुप सञ्चालक र कर्मचारीहरुलाई तालिम प्रदान गरिएको संस्थाका अध्यक्ष नगेन्द्र प्रसाद घिमिरेले जानकारी दिनुभयो । संस्थाका प्रवन्धक मनोज विष्टका अनुशार लेखा विधिलाई नयाँ ढाँचामा लैजाने तयारी स्वरुप संस्थाकै आयोजनामा एनएफ आरएस फर एसएम इएस विषयको तालिम प्रदान गरिएको हो ।